Psa 54 | MPS | STEP | Devitgo te balia asęani, te Sifde sę yali bidi dabego te Solba po waligi peyu, te Devit augwali tomode geme dualalubo po waligi pai, te sęde agai homu kone ma paliyu, e balia po asęai dao. 1 Samuel 23:19, 26:1 tede elalubo po suao. God, te nago bomogo, nago ena te dwai bidi dabego nogode ma sao. Te nago genuai bomogo nago ena te olo mu bidimainu ebo bidi pedalumainu ilao.

Psalms 54

Devitgo te balia asęani, te Sifde sę yali bidi dabego te Solba po waligi peyu, te Devit augwali tomode geme dualalubo po waligi pai, te sęde agai homu kone ma paliyu, e balia po asęai dao.

1 Samuel 23:19, 26:1 tede elalubo po suao.

Bidigo gedu haluasa po weyu, te Godigo aga tau somainu yai

1 God, te nago bomogo,
nago ena te dwai bidi dabego nogode ma sao.
Te nago genuai bomogo nago ena
te olo mu bidimainu ebo bidi pedalumainu ilao.
2 God, eno homugo nago eno
gedu haluasa po wabo odomainu homu ebao.
Eno homugo nago eno wabo poba
olo mumainu homu ebo dao.

3 Te hagoma ebo bidi dabe aselama,
te augwaligo ena dali hwįainu ebao.
Te homu dene isiąbo bidi dabe
augwaligo ena ela muainu ebao.
Te bidi dabe augwaligo homugo
te God olo nai tiwai da homu ebo dao.

4 Tiali goli, Godigo digi ena tau sabo bidi dao.
Mu tama, Genuai Bidigo te ena tonalubaso,
tama ena bugagia bidibo dao.
5 Te Godigo eno boi bidi dabeba
te tiwai dene mawaibao.
Te augwaligo enaba ebo kolesagade,
tego augwa digi dolaibao.
Godigo ena me tagalogobeo,
tama tiyu, agai te boi bidi dabe mu silaibao.
6 Genuai Bidi, eno te nageba ofa
maiyabo homu wei ebao.
Nage te wiegi yai mu da,
tama tiyu, eno nageba gedu haluasa
pode usu da mu obao.
7 Nago ena tau selama, tama enaba
te pedelali tigidali sęgęgo te ena aiyaba me elalubeo.
Tama eno suali, te nago eno
boi bidi dabe aiyaba elalubo subo dao.